DE VIRIS ILLUSTRIBUS 66–68
66. Cornelius episcopus
Cornelius, Romanae urbis episcopus, ad quem octo Cypriani extant epistulae, scripsit Epistulam ad Fabium,1 Antiochenae ecclesiae episcopum, De synodo Romana et Italica et Africana, et aliam De Novatiano et de his qui lapsi sunt, tertiam De gestis synodi, quartam Ad eundem Fabium1 valde prolixam et Novatianae haereseos causas et anathema continentem.
Rexit ecclesiam sub Gallo et Volusiano annis duobus; cui ob Christi martyrium coronato successit Lucius.
67. Cyprianus episcopus
Cyprianus Afer primum gloriose rhetoricam docuit, exinde, suadente presbytero Caecilio, a quo et cognomentum sortitus est, Christianus factus omnem substantiam suam pauperibus erogavit, ac post non multum temporis adlectus in presbyterium etiam episcopus Carthaginiensis constitutus est. Huius ingenii superfluum est indicem texere, cum sole clariora sint eius opera.
Passus est sub Valeriano et Gallieno principibus persecutione octava, eo die quo Romae Cornelius, sed non eodem anno.
68. Pontius diaconus
Pontius, diaconus Cypriani, usque ad diem passionis eius cum ipso exsilium sustinens, egregium volumen Vitae et passionis Cypriani reliquit.
Latinankielinen teksti on editiosta Richardson 1896: Hieronymus: Liber de viris inlustribus. Herausgegeben von E.C. Richardson. Texte und Untersuchungen zur Geschichte der altchristlichen Literatur. Vierzehnter Band. Leipzig. Lukujen otsikot on otettu teoksen alussa olevasta sisällysluettelosta (capitula). Alaviitteessä mainittua varianttia lukuun ottamatta käsikirjoituksissa ei ole merkittäviä eroja näiden lukujen kohdalla. Tekstin suomennos on saatavilla tästä linkistä.
1) Osassa käsikirjoituksista lukee »Fabianum».