De ortu et obitu patrum 126–127
[126] Iohannes, apostolus et evangelista, filius Zebedei, frater Iacobi, virgo electus a Domino atque inter ceteros magis dilectus, qui etiam super pectus magistri recumbens evangelii sui fluenta de ipso sacro dominici pectoris fonte potavit, et quasi unus de paradisi fluminibus verbi Dei gratiam in toto terrarum orbe diffudit; quique in loco Christi, Christo iubente, successit, dum suscipiens matrem magistri discipulus etiam ipse pro Christo alter quodammodo derelictus est filius. [127] Hic dum evangelium Christi in Asia praedicaret, a Domitiano Caesare in Pathmos insulam metallo relegatur, ubi etiam positus Apocalypsin scripsit. Interfecto autem Domitiano, a senatu exsilio resolutus recessit Ephesum, ibique ob haereticorum refutandas versutias, efflagitatus ab Asiae episcopis evangelium novissimus edidit.De ortu et obitu patrum 134
Matheus, apostolus et evangelista, qui etiam ex tribu sua Levi sumpsit cognomen; ex publicano a Christo electus, ex peccante translatus. Primum quidem in Iudaea evangelizat, postmodum in Macedonia praedicat. Requiescit in montibus Parthorum.De ortu et obitu patrum 143–144
[143] Lucas, evangelista et apostolicae conscriptor historiae, natione Syrus, arte medicus, Graeco eloquio eruditus, quem plerique tradunt proselytum fuisse et Hebreas litteras ignorasse. Hic tamen fuit Pauli discipulus et individuus comes peregrinationis eius. [144] Quique ab ineunte pueritia castissimus fuit et evangelicae praedicationis opus exercuit. Obiit septuagensimo quarto vitae suae anno, sepultus in Bithynia;1 cuius quidem ossa regnante Constantio2 in Constantinopoli sunt translata.De ortu et obitu patrum 145–146
[145] Marcus, evangelista secundus, Petri discipulus eiusque in baptismate filius, cuius quidem evangelium nonnulli a Petro Romae dictatum ferunt. Hic, ne ad sacerdotium moveretur, abscidisse sibi pollicem fertur. [146] Primus tamen Alexandriae cathedram tenuit primusque ecclesiam Aegyptiorum fundavit, tantis doctrinae et continentiae virtutibus florens, ut omnes discipuli Christi eius imitationem sequerentur. Mortuus est octavo Neronis anno placida quiete sepultus.De ecclesiasticis officiis 1,12,11
In Novo autem testamento quattuor libros evangeliorum quattuor evangelistae singulos scripserunt; quorum solus Matheus Hebreo scripsisse perhibetur eloquio, ceteri Graeco.Chronica 1,238–245 ed. Martin
[238] Tiberius filius Augusti regnavit annos XXIII. [239] Huius octavo decimo anno Dominus crucifixus est peractis a principio mundi annis VCCXXVIII. [240] Gaius Caligula regnavit annos IIII. [241] Hic in deos se transferens in templo Hierusolimorum statuam Iovis sub nomine suo poni iussit. [242] Per idem tempus Matheus apostolus evangelium in Iudaea primus scripsit. [243] Claudius regnavit annos XIIII. [244] Petrus ad superandum Simonem magum Romam pergit. [245] Marcus quoque evangelista Alexandriae Xristum evangelizat.3Chronica 1,257–267 ed. Martin
[257] Domitianus frater Titi regnavit annos XVI. [258] Hic post Neronem secundus Xristianos persequitur. [259] Sub quo et apostolus Iohannes in Pathmos insula religatur. [260] Iste multos senatorum in exilio mittit ac perimit [261] cunctosque qui de genere David erant interfici iussit, ut nullus Iudaeorum ex regali superesset origine. [262] Nerva regnavit annum I. [263] Iohannes apostolus ab exilio Ephesum redit atque efflagitatus ab Asiae episcopis evangelium novissimus edidit. [264] Traianus regnavit annos XVIIII. [265] Iste Asia et Babylonia capta usque ad Indiae fines post Alexandrum accessit. [266] Huius temporibus Simon Cleopas Hierusolimorum episcopus crucifigitur [267] et requiescit Iohannes apostolus.Origines 5,39,26
Octavianus ann. LVI. Christus nascitur. Tiberius ann. XXIII. Christus cruci figitur. Gaius Caligula ann. IV. Matthaeus evangelium scripsit. Claudius ann. XIV. Marcus evangelium edidit.Origines 6,2,34–39
[34] Quattuor libros evangeliorum quattuor evangelistae singulariter conscripserunt. [35] Primus Matthaeus conscripsit evangelium litteris Hebraicis et sermonibus in Iudaea ... [36] Secundus Marcus plenus Sancto Spiritu scripsit evangelium Christi eloquio Graeco in Italia, secutus Petrum ut discipulus. ... [37] Tertius Lucas, inter omnes evangelistas Graeci sermonis eruditissimus, quippe ut medicus in Graecia, evangelium scripsit Theophilo episcopo ... [39] Quartus Iohannes scripsit evangelium ultimus in Asia.Yllä olevat teoksen De ortu et obitu patrum tekstit ovat editiosta Chaparro Gómez 1985 Paris. Teoksen De ecclesiasticis officiis teksti on editiosta Lawson 1989 CCSL 113 Turnhout. Kronikan tekstit ovat sen ensimmäisestä versiosta Martinin edition mukaan (Martin 2003 CCSL 112 Turnhout). Teoksen Origines eli Etymologiae tekstit ovat editiosta Lindsay 1911 Oxford. Katkelmien suomennokset ovat saatavilla tästä linkistä.
1) Osassa käsikirjoituksista lukee »Bethania».
2) Osassa käsikirjoituksista lukee »Constantino».
3) Isidoruksen itsensä muokkaamassa Kronikan toisessa versiossa lukee tässä kohdassa (Isid.chron. 2,245 ed. Martin): »Marcus quoque evangelista Alexandriae Xristum praedicans evangelium scripsit.»